Դատարանն ավարտել էր ամբաստանյալների հարցաքննության փուլը եւ պետք է սկսեր ապացույցների հետազոտումը, սակայն նիստը բացելով դատավորն անսպասելիորեն հայտնեց, որ դատարան է ներկայացել 7 ամիս առաջ՝ զորացրվելուն պես նիստերը Երեւանից Իջեւան տեղափոխելուց հետո անհետացած վկա Արման Մնացականյանը, ով եղել է հենակետի խոհարարը եւ ամենայն հավանականությամբ ականատես է եղել Արտակ Նազարյանի սպանությանը: Դատավորի հարցերին պատասխանելով՝ նա ասաց, թե հիվանդ է եղել, հիմա էլ է վատ զգում, բայց պատրաստ է պատասխանել հարցերին: Այնուամենայնիվ, նա հրաժարվեց պատասխանել այս 7 ամիսների ընթացքում իր գտնվելու վայրի եւ առողջության մասին որեւէ հարցի՝ պնդելով, թե դա իր անձնական կյանքն է: Դատախազները առարկում էին կողմերի նմանատիպ հարցերին, իսկ դատավորը կասեցնում էր եւ հարցերը հանում, թեեւ տուժող կողմը պնդեց, որ այս պարզաբանումները կարեւոր են գնահատելու համար վկայի ցուցմունքների արժանահավատությունը: Դեպքի մանրամասների մասին հարցերին էլ Ա. Մնացականյանը պատասխանում էր՝ «չեմ հիշում», «չգիտեմ», «չեմ կարող պատասխանել»: Թեեւ պնդում էր, որ ինքն է գրել եւ կարդացել իր բոլոր նախաքննական ցուցմունքները, բայց չկարողացավ կարդալ քննիչի ձեռքով գրի առած ցուցմունքը, չկարողացավ ասել «նասիլկա» բառի հայերեն տարբերակը, թեեւ ցուցմունքում գրել էր «պատգարակ»: Հարցաքննության ընթացքում նա իրեն պահում էր անքաղաքավարի եւ քամահրական ու կոպիտ պատասխաններ էր տալիս: Դատավորը նրան կարգի հրավիրեց մեղմորեն, իսկ կողմերի պաշտպաններին սաստում էր ձայնը բարձրացնելով: Հարցաքննության ընթացքում վկան նյարդայնանում էր, ծնոտը դողում էր: Նրա նյարդային լարումը գնալով մեծացավ եւ նա պոռթկաց ամբաստանյալ Վահագն Հայրապետյանի կողմից հարցաքննվելիս: Վերջինիս հարցին այն մասին, թե ի՞նչ դեպք է տեղի ունեցել հենակետում վերջին հերթափոխի ժամանակ, Արման Մնացականյանը պատասխանեց. «Արտակ Նազարյանի սպանությունը»: Ի պատասխան տուժողի իրավահաջորդի վերահաս հարցին, թե ո՞վ է սպանել, վկան ընդվզեց. «Չգիտեմ, ես էնտեղ չեմ էղել»:
https://www.facebook.com/events/241665589282353/permalink/257871270995118/
No comments:
Post a Comment