Վկան հուսախաբ արեց

20/04/2012 12:05

Նրանից սպասելիքները մեծ էին, որովհետեւ վերջինս ամբաստանյալների ծնողներին մասնավոր զրույցում ասել էր, որ ինքը գիտի ճշմարտությունը, եւ ամբաստանյալի աթոռին նստած հինգ տղաները հանցանք չեն կատարել, մեղավոր չեն Նազարյանի մահվան համար: Այնինչ վկայի` դատարանում տված ցուցմունքը նախաքննականից ոչնչով չտարբերվեց: Սայադյանը հարցերին պատասխանելիս զգուշավորություն էր ցուցաբերում: Այս մեկն էլ, նախորդ վկաներից ոմանց նման, ձգտում էր չհիշել դեպքի հետ կապված կարեւոր մանրամասները:

Այդուհանդերձ, վկան խոստովանեց, որ 9 օր, առանց իր կարգավիճակն իմանալու, ազատազրկված է եղել Բերդ քաղաքի ռազմական ոստիկանությունում, եւ որ իրեն տեղափոխել են այլ խուց երեք օր հետո, երբ նա սկսել է ցուցմունք գրել, եւ նրա խուց են բերել այլ վկաների:

Տուժողի իրավահաջորդի ներկայացուցիչներից իրավապաշտպան Ռուբեն Մարտիրոսյանը վկային հորդորեց անկեղծ պատասխանել: Զորամասի նախկին գրագիրը հայտարարեց, որ 2010թ. հուլիսի 27-ի գիշերն ինքը Արտակ Նազարյանի հետ սուրճ է խմել: Այնինչ դատաբժշկական փորձաքննությամբ Նազարյանի  մարմնում միայն ալկոհոլ է հայտնաբերվել: Համարելով, որ վկան փաստերը խեղաթյուրում է, Ռուբեն Մարտիրոսյանը հայտարարեց, թե ինքը միջնորդելու է, որ վկայի նկատմամբ սուտ ցուցմունք տալու համար քրեական գործ հարուցվի:

Դատական նիստի ժամանակ դատավոր Սամվել Մարդանյանը կարգադրիչներին հրահանգեց դահլիճից հեռացնել ամբաստանյալ Մխիթար Մխիթարյանի հորը` Մանվել Մխիթարյանին: Բանն այն է, որ վերջինս  դահլիճից բարձրաձայնեց, որ վկան, իրեն հանդիպելով, հավատացրել էր, որ դատարանում ինքը կասի ճշմարտությունը:

Դատարանում տված ցուցմունքում Գարեգին Սայադյանը, ինչպես նախորդ վկաները, չկարողացավ բերել հիմնավոր փաստարկ, որով հնարավոր լիներ ապացուցել, որ ամբաստանյալները որեւէ կապ ունեն Արտակ Նազարյանի մահվան հետ: Բայց նշեց, որ վաշտի հրամանատար կապիտան Ուդումյանը եւ Նազարյանը հեռախոսով հայհոյել են միմյանց: Հաջորդ նիստը կկայանա մայիսի 2-ին:

Գագիկ Աղբալյան
Տավուշի մարզի թղթակից

http://armtimes.com/hy/article/33132